PIN կոդի և բանկային գաղտնաբառի գաղտնիության կարևորությունը

Evocabank-ում Դուք անձամբ գեներացնում եք Ձեր իսկ նախընտրած PIN կոդը ժամանակակից և ապահով տարբերակով՝ քարտը բանկոմատով ակտիվացնելու ժամանակ։ Ձեր PIN կոդը չգիտեն նույնիսկ բանկի աշխատակիցները։
Իսկ բանկային գաղտնաբառը սովորաբար օգտագործվում է բանկային աշխատակցի կողմից՝ Ձեզ հեռահար նույնականացնելու նպատակով։

PIN կոդը մուտքագրելիս եղեք ուշադիր, որպեսզի ոչ ոք չտեսնի Ձեր կոդը և հետագայում օգտագործի այն՝ Ձեր քարտը հափշտակելով։ Կարող եք կոդը մուտքագրելիս ծածկել ստեղնաշարը ձեռքով։ Խուսափեք նաև PIN կոդը քարտի վրա գրելուց, մի գրանցեք այն հեռախոսի կամ համակարգչի մեջ և երրորդ անձանց համար հասանելի այլ վայրերում։

Ձեր քարտային տվյալները (քարտի համար, PIN կոդ, բանկային գաղտնաբառ, CVV/CVC թվեր, քարտի վավերականության ժամկետ, մեկանգամյա օգտագործման գաղտնաբառ՝ 3D secure կամ VBV) պետք չէ ուղարկել SMS-ի, էլեկտրոնային նամակի կամ այլ ցանկացած եղանակով, ինչպես նաև սոցցանցերում և մեսենջերներում մի տեղադրեք կամ ուղարկեք քարտի նկարը կամ այլ քարտային տվյալ։

Այսօր շատ քարտեր ունեն նաև PayWave կամ PayPass տեխնոլոգիա, որը թույլ է տալիս քարտը պարզապես մոտեցնել POS տերմինալին և անհպում ու առանց PIN կոդի մուտքագրման կատարել վճարում՝ մինչև 20,000 ՀՀ դրամի կամ դրան համարժեք արտարժույթի սահմանաչափով։
Եղեք զգոն և այս տեսակի քարտերը մի՛ թողեք առանց հսկողության։

Ձեր վճարային քարտի դիմերեսին կամ հակառակ երեսին կան նաև եռանիշ կամ քառանիշ CVV/CVC թվեր, որոնց գաղտնիությունը նույնպես կարևոր է։ Այդ կոդը հիմնականում օգտագործվում է օնլայն վճարումների ժամանակ։ Խորհուրդ է տրվում այն ծածկել ինքնակպչունով, քանի որ այդ կոդի և քարտային համարի հասանելիությամբ Ձեր քարտից կարող են գումար հափշտակել՝ առանց Ձեր իմացության։

Իսկ օնլայն առևտուր անելիս օգտվեք միայն վստահելի կայքերից, որպեսզի Ձեր անձնական և քարտային տվյալները հասանելի չդառնան զեղծարարներին։

Ինչպես նաև խորհուրդ է տրվում գումարը պահել ոչ քարտային հաշիվների վրա։ Անհրաժեշտության դեպքում բանկային հավելվածի` EvocaTOUCH-ի միջոցով հաշված րոպեներում կարող եք գումարը փոխանցել Ձեր քարտին և օգտագործել։

Evocabank-ի քարտերով իրականացվող գործարքները պաշտպանված են 3D secure և VBV համակարգերով։